Најмалку 70 лица се убиени, а 30 ранети во напад на банди во руралните заедници околу Жан-Дени во регионот Артибонит на Хаити, соопшти групата за човекови права „Дефенсурс Плус“.
Официјалните проценки беа многу пониски, наведувајќи помеѓу 16 и 17 мртви.
Нападот започна во раните утрински часови во недела и траеше до понеделник, кога вооружени групи запалија куќи и раселија околу 6.000 луѓе.
Според Обединетите нации, повеќе од 2.000 жители ги напуштија своите домови дури и пред нападот поради рации во областа, објавува Ројтерс.
Полицијата распореди три оклопни возила, но нивното пристигнување беше одложено поради дупки ископани од бандите на патот. Кога пристигнаа, напаѓачите веќе избегаа, а неколку куќи беа изгорени.
Повредените беа однесени во локална болница, а мртвите во две мртовечници.
Дефенс Плус процени дека 50 куќи се уништени.
Аудио порака што му се припишува на водачот на бандата Гран Гриф, Лаксон Елан, сугерира дека нападот бил одмазда за нападите на соперничката група врз нивната база Савиен.
Регионот Артибоните, клучна земјоделска област на Хаити, претходно беше место на некои од најлошите насилства.
Според извештајот на ОН, речиси 20.000 луѓе се убиени во земјата од 2021 година, додека бандите стануваат сè помоќни и независни.
Гран Гриф и Вив Ансанм, кои собираат стотици банди во главниот град, се прогласени за терористички организации од Вашингтон.
Тие се обвинети за масовни убиства, силувања, палење, кражба и трговија со оружје, дрога и човечки органи.
Соединетите Американски Држави овој месец понудија награда до три милиони долари за информации за нивните финансиски активности.