Глобалната продажба на полупроводници треба да достигне 1 трилион долари оваа година, објави во петокот здружението на индустријата за полупроводници.
Во 2025 година, приходот од продажбата на чипови изнесуваше 791,7 милијарди долари, што е за 25,6 отсто повеќе од 2024 година, соопшти групата што го претставува најголемиот дел од американските компании во секторот за чипови.
Тие очекуваат силен раст и оваа година, бидејќи големите технолошки компании ширум светот трошат стотици милијарди долари за градење центри за податоци за вештачка интелигенција.
Водечки во растот и најголемиот сегмент беа напредните компјутерски чипови произведени од Nvidia, Advanced Micro Devices и Intel.
Минатата година продажбата на тие производи е зголемена за 39,9 отсто, на вкупно 301,9 милијарди долари.
Зголемување на цените во услови на недостиг
На второ место се најдоа мемориските чипови чии цени растат поради недостигот предизвикан од вештачката интелигенција.
Продажбата на мемориски чипови се зголеми за 34,8 отсто на 223,1 милијарди долари.
Бумот на вештачката интелигенција се прошири на речиси сите сегменти на индустријата за чипови.
Џон Нојфер, претседател и главен извршен директор на групацијата производители со седиште во Вашингтон, на неодамнешната посета на Силиконската долина рече дека менаџерите на многу помали компании се оптимисти за нивните прогнози за 2026 година.
„Постојано слушав од нив „никој не знае што ќе се случи со развојот на вештачката интелигенција за една година, но моите нарачки се полни“, рече Нојфер.
„Барем за следната година, ние сме на пат на прилично силен раст“, додаде шефот на групата за Ројтерс.