Поранешната шефица за надворешна политика на ЕУ, Федерика Могерини, и уште две лица се официјално обвинети за измама во јавните набавки и корупција, судир на интереси и кршење на професионална тајна, објави во среда Канцеларијата на европскиот јавен обвинител (ЕЈО).
Три лица беа приведени во вторник како дел од истрагата за измама на ЕУ и сега се ослободени во исчекување на истрагата, соопшти ЕЈО, додавајќи дека тие не се сметаат за ризик од бегство.
ЕЈО именуваше висок член на персоналот на Колеџот на Европа во Бриж и висок функционер на Европската комисија како уште двајца осомничени.
Три извори изјавија за Ројтерс дека еден од приведените е високиот дипломат на ЕУ, Стефано Санино.
Ниту Могерини ниту Санино не беа достапни за коментар, истакнува Ројтерс.
„Невина додека не се докаже вината“
Федерика Могерини беше потпретседателка на ЕК и висока претставничка за надворешна политика и безбедност од 2014 до 2019 година, а од 2020 година е ректорка на Колеџот на Европа.
Стефано Санино е еден од најискусните европски дипломати.
Тој беше генерален секретар на Европската служба за надворешни работи (EEAS) од 2021 година до оваа година, кога ја презеде Генералната дирекција на Комисијата за Блискиот Исток, Северна Африка и Заливот.
„Сите лица се сметаат за невини сè додека не се докажат нивните вина од страна на надлежните белгиски судови“, нагласи EPPO.
Во вторник, на барање на EPPO, белгиската полиција ги претресе просториите на EEAS и Колеџот на Европа во Бриж поради сомневање дека престижната постдипломска високообразовна институција однапред добивала информации за тендерот за обука на дипломати.
Дали елитната институција добила наместен тендер?
Истрагата се спроведува во врска со проектот на Дипломатската академија на Европската Унија – деветмесечна програма за обука на помлади дипломати во земјите-членки – која беше доделена од Европската служба за надворешни работи (EEAS) на Колеџот на Европа во Бриж, во периодот 2021-2022 година, по тендер.
Истрагата се обидува да утврди дали Колеџот на Европа, елитна образовна институција каде што се образуваат многу функционери на ЕУ, бил однапред информиран за критериумите за избор во тендерската постапка и дали претставниците на Колеџот имале доволно причини да веруваат дека ќе им биде доделена имплементацијата на проектот, пред официјалното објавување на тендерот.
Могерини и Санино, двајцата италијански државјани, се добро познати во дипломатските кругови во Брисел, а веста за нивното притворање предизвика шок во заедницата на ЕУ.
Фон дер Лајен во проблеми
Политико пишува во среда дека поради таа афера, претседателката на ЕК, Урсула фон дер Лајен, се соочува со најголемиот предизвик за ЕУ - истрагата за измама во која се вклучени две високи имиња во Брисел, која се заканува да се претвори во целосна криза.
Точно една година од нејзиниот втор мандат како претседател на Комисијата, фон дер Лајен, веќе соочувајќи се со прашања за нејзината посветеност на транспарентноста, сега мора да најде начин да докаже дека не е вмешана во скандал што датира од нејзините први години на функцијата, истакнува Политико.
Соопштението на Канцеларијата на Европскиот јавен обвинител дека поранешната шефица за надворешни работи на ЕУ и висок дипломат, која моментално работи во Комисијата на фон дер Лајен, е приведена во вторник, беше искористено од нејзините критичари, со постојани повици таа да се соочи со четврто гласање за недоверба.