Американскиот претседател Доналд Трамп и украинскиот претседател Володимир Зеленски се сретнаа вчера во Белата куќа, а фокусот на разговорот беше на можната испорака на американски ракети „Томахавк“ и завршувањето на војната во Украина.
Според извор од украинската делегација во Вашингтон, Зеленски му покажал на Трамп мапи со обележани воени и економски цели во Русија.
На нив, како што е наведено, биле обележани „точки на притисок во руската одбранбена и воена инфраструктура“ што би можеле да бидат погодени за да се принуди Москва да ја прекине својата агресија.
Зеленски по состанокот изјави дека разговорот бил „продуктивен“ и дека „смета на Трамп да изврши притисок врз Путин“.
Тој додаде дека е отворен за трипартитен состанок со Трамп и Путин за да се најде пат кон мир.
Трамп, од друга страна, напиша на својата мрежа Truth Social дека „е време да се најде договор за завршување на војната“, велејќи дека конфликтот треба да се запре „таму каде што е“.
Според Зеленски, на состанокот било разговарано и за потенцијалната испорака на ракети „Томахавк“ на Украина, но американската страна во моментов го избегнува тој чекор за да спречи понатамошна ескалација со Москва.