Шведската активистка Грета Тунберг изјави дека таа и другите притворени активисти од флотилата во Газа немале пристап до чиста вода додека биле во притвор во Израел и дека поради тоа се разболеле.
Тунберг беше меѓу деветте шведски активисти приведени минатата недела откако Глобалната флотила Сумуд, која се обидуваше да достави хуманитарна помош во Појасот Газа, беше пресретната од израелската војска.
Приведените активисти се вратија во Шведска.
Зборувајќи на прес-конференција одржана во Сергелс Торг во Стокхолм заедно со други активисти, Тунберг нагласи:
„Им кажавме на луѓето што дојдоа од шведскиот конзулат дека немавме пристап до чиста вода за пиење за време на нашиот престој во притвор бидејќи водата беше контаминирана и се разболевме“.
„Без разлика што ќе кажеме, нашите влади нема да преземат мерки против Израел“
Наведувајќи дека побарале помош од конзуларните службеници бидејќи водата од чешма била валкана, таа додаде:
„Тие (Израелците) фрлаа шишиња полни со вода за пиење пред нас и ни се смееја што бараме чиста вода. Им рековме: „Нема да си одиме додека не добиеме пристап до чиста вода за пиење“.“
Тунберг истакна дека ги пријавиле своите жалби кај шведските конзуларни службеници.
„Кога конзуларните службеници си заминуваа по состанокот со нас, им реков: „Кога ќе си одите, ќе нè претепаат, бидејќи никој нема да гледа“. Шведските службеници сепак си заминаа“, рече таа.
Таа тврди дека биле подложени на физичка тортура.
„Луѓето се онесвестија, а кога побаравме лекар и лекови, тие ставија 60 луѓе во мали кафези и ни рекоа дека ќе нè убијат со гас“, рече таа.
Таа ја критикуваше шведската влада, како и другите влади за нивната неактивност.
„Да бидам искрена, навистина не знам што да кажам, бидејќи без разлика што ќе кажеме, ништо не може да ги натера нашите влади да преземат мерки против Израел“, се пожали таа.