Во Центарот за култура „Трајко Прокопиев“ – Куманово од утре од 20 часот започнува 28. издание на Меѓународниот театарски фестива „Денови на комедија“.
Љубителите на комедијата ќе имаат можност да проследат 11 претстави од Македонија, Србија и Бугарија кои годинава ќе се најдат на репертоарот.
Утревечер на свеченото отворање се очекува да присуствуваат и министерот за култура и туризам Зоран Љутков и градоначалникот Максим Димитриевски. Пред да започне официјално првата претстава, ќе биде доделена наградата „Васил Иљоски“ на годинешниот лауреат на фестивалот, актерката Весна Петрушевска – Бејби.
Честа да го отвори фестивалот, годинава му припаѓа на Театарот „Јохан Џ. К. – Џинот“ од Велес со претставата „Госпоѓа министерка“.
Станува збор за комедија која го илустрира токму времето во кое живееме, а во претставата играат Зорица П. Панчиќ, Фаик Мефаиловски, Талија Настов, Симона Димковска, Исидор Јовановски, Благојчо Стојанов, Стефан Николовски, Кире Ацевски и Филип Христовски, под режисерска палка на Синиша Евтимов.
Шлаг на торта секоја година, така и ова ќе биде претставата на Театар Куманово. Годинава ќе ја играат „Разбуди се Тина“, а освен премиерата, скоро е распродадена и првата реприза закажана веднаш ден по фестивалот.
За огромниот интерес на фестивалот говори и фактот што само првиот ден откако беа пуштени во продажба, имаше огромни редици пред Центарот за култура, а според информациите на Кумановски Муабети продадени се над 1.500 билети само во саботата.
Дел од претставите се веќе целосно распродадени.
Никола Ивановски