Аргентинските адвокати за заштита на човековите права денес објавија дека поднеле кривична пријава до аргентинските федерални судови барајќи апсење на израелскиот премиер Бенјамин Нетанјаху ако ја посети таа земја за, како што тврдат, учество во воени злосторства во Појасот Газа.
Медиумите претходно објавија дека Нетанјаху ќе ја посети Аргентина следниот месец, но владата во Тел Авив не ги потврди тие обвинувања, објавува „Тајмс оф Израел“.
Кривичната пријава поднесена до аргентинските федерални судови, исто така, бара истрага за израелските политички и воени власти во врска со инцидентот од 23 март во Газа, во кој загинаа 15 лица, вклучувајќи неколку лица од итни интервенции кои им помагаа на жртвите, според досие што го виде Ројтерс.
Аргентинскиот весник „Кларин“ објави дека наместо да ја посети таа земја, Нетанјаху би можел да побара средба со аргентинскиот претседател Хавиер Мајли следниот месец во Њујорк, каде што двајцата ќе присуствуваат на Генералното собрание на Обединетите нации.
„Јасно е дека Нетанјаху е кривично одговорен како еден од сторителите на военото злосторство за намерно предизвикување смрт со глад, злосторства против човештвото како што се убиство, прогон и други нехумани дела“, се вели во тужбата поднесена од аргентинскиот адвокат за човекови права Родолфо Јанзон и Раџи Сурани, директор на Палестинскиот центар за човекови права, пренесува Танјуг.