Европскиот парламент се подготвува да расправа за гласање недоверба на претседателката на Европската комисија, Урсула фон дер Лајен, според извештаи на Euractiv и Euronews.
Пипереа поднел барање, го поддржале 79 пратеници?
Романскиот крајно десничарски пратеник Ѓорѓе Пипереа, лидер на партијата Сојуз за унијата на Романците (AUR) и член на групата Европски конзервативци и реформисти (ECR), покренал иницијатива за гласање недоверба на претседателката на Европската комисија Урсула фон дер Лајен.
Минатата недела Пипереа поднел барање со 74 почетни потписи.
Иако некои пратеници подоцна ја повлекле својата поддршка, Пипереа тврди дека бројот се зголемил на 79, што е доволно за предлогот официјално да се разгледува во Парламентот.
Урсула фон дер Лајен ќе се соочи со гласање недоверба во Европскиот парламент в четврток, потврдиле шест официјални лица за POLITICO.
Најнов предизвик за претседателката на Европската комисија доаѓа во турбулентната прва година од нејзиниот втор мандат.
Германската политичарка ќе биде принудена во понеделник да учествува во расправа за своето водење пред пратениците во Стразбур, а три дена подоцна ќе следи гласањето.
Првпат по 10 години
Ова е првпат во повеќе од десет години да се покрене гласање недоверба на челник на Европската комисија.
Во оваа фаза, гласањето е претежно симболично – повеќето политички групи веќе најавиле дека ќе гласаат против предлогот за недоверба – но постапката јасно покажува растечко незадоволство кон неа во Брисел поради низа контроверзни одлуки и скандали.
Причини за покренување на предлогот
Иницијативата произлегува од незадоволството на Пипереа поради необјавените пораки меѓу фон дер Лајен и извршниот директор на Pfizer, Алберт Бурла, за време на преговорите за набавка на вакцини против COVID-19.
Дополнителни обвиненија вклучуваат можни злоупотреби на фондови за опоравок по пандемијата и тврдења дека Комисијата поттикнала зелени политики преку финансирање невладини организации.
Мали шанси за успех
Претседателката на Европскиот парламент, Роберта Мецола, ја информирала Конференцијата на претседатели дека предлогот ги исполнува правилата од член 131 од Деловникот на Парламентот.
Расправата е закажана за понеделник, 7 јули, а гласањето би се одржало во четврток, 10 јули, за време на пленарната седница во Стразбур, во зависност од конечната одлука на Метсола.
За да помине предлогот, потребни се најмалку 361 глас од вкупно 720 пратеници, што е малку веројатно.
Пипереа изјавил дека верува оти мнозинството пратеници ќе гласаат против предлогот, додавајќи дека иако многумина се незадоволни од политиките на фон дер Лајен, најверојатно сè уште не се подготвени да бараат нејзина оставка.
Сепак, тој се надева дека оваа иницијатива може „да ја отвори Пандорината кутија“ и да поттикне понатамошни обиди за гласање недоверба во наредните месеци.
Последни активности на фон дер Лајен
Во јули 2024 година, новоизбраниот Европски парламент ја потврди Урсула фон дер Лајен за втор мандат како претседателка на Комисијата (2024–2029).
Таа неодамна застапуваше развој на европски стратегии за одбрана и одвраќање до 2030 година поради стравот од руска агресија врз НАТО и европските држави.
Фон дер Лајен исто така повика Западот да го засили притисокот врз Кремљ за да се запре војната против Украина.