Четири лица загинаа, а 35 се ранети во нападите на руски беспилотни летала врз градот Харков во источна Украина, соопштија синоќа украинските власти.
Телата се пронајдени во урнатините на станбени згради и канцеларии во една од областите на Харков, соопштија украинските служби за итни случаи.
Вкупно 35 лица, меѓу кои и едно дете, беа ранети во нападите, за кои се вели дека биле извршени со руски беспилотни летала во четвртокот вечерта и предизвикале пожари во соседството.
Уште пет лица се ранети во регионите Днепро, Запорожје и Киев, според локалните власти кои исто така ја обвинија Москва.
Украински беспилотни летала убиле едно лице во селото Белаја Берјоска во руската погранична област Брјанск, изјави гувернерот Александар Богомаз, обвинувајќи го Киев дека намерно гаѓал цивили.
Двете земји рекоа дека му пренеле информации на Вашингтон за тоа како другата страна го прекршува кревкиот мораториум на удари врз енергетските инсталации.
Мораториумот беше прогласен од САД минатата недела по одделни преговори со Украинците и Русите во Саудиска Арабија.