Во Скопје во барот „Пјаца Либерта“ на 15 јануари 2025 со почеток од 17:00 часот започна настанот со кој се одбележува 24-от роденден на Википедија – најпознатата енциклопедија на Интернет. Овој датум традиционално се одбележува од страна на сите википедијански заедници во светот како датум на основање на енциклопедијата, а македонската заедница на Википедија предводена од локалниот македонски огранок Викимедија МКД со големо задоволство се приклучува со одбележување на овој значаен настан.
Википедија е онлајн енциклопедија која овозможува бесплатен пристап до енциклопедиски содржини на 340 јазици. Првата јазична верзија е Википедија на англиски јазик и основана е на 15 јануари 2001 година. Основачи на најпозната енциклопедија и креатори на идејата се Џими Велс и Лери Сангер, кои со здружени сили ја започнале работата, првично само на англиски јазик. Македонската јазична верзија на Википедија е основана во септември 2003 година и денес брои над 148.000 статии на македонски јазик.
На прославата во Скопје присуствуваа активни уредници, поддржувачи и љубители на слободното знаење, кои заеднички го одбележаа значењето на оваа глобална платформа за размена на информации. Настанот започна со неформални разговори, каде присутните имаа можност да споделат свои искуства, успеси и предизвици со уредувањето на статиите на Википедија на македонски јазик. Дополнително, беа доделени две статуетки како признание за траен придонес на Википедија на македонски јазик на двајца корисници на Википедија.
Специјално подготвена за оваа пригода, тортата беше во централниот фокус на настанот со што и официјално се прославија 24 години дружење со Википедија.
Покрај самиот настан збогатен со признанија, дружба и роденденска торта, Википедија доби и свои подароци. На самиот ден на роденденот, на 15 јануари 2025 година, Викимедија МКД објави повик до сите корисници на Википедија да објават статии како роденденски подарок за Википедија.
Среќен роденден Википедија!
Интегрално соопштение