Јужнокорејскиот претседател Јун Сук-Јол денеска изјави дека е подготвен да формира консултативно тело на работно ниво со Северна Кореја за да разговара за начините за намалување на тензиите и продолжување на економската соработка, додека ја изложи својата визија за обединување со соседот.
Во својот говор за Денот на националното ослободување по повод 79-годишнината од независноста од јапонската колонијална власт по Втората светска војна, Јун рече дека е подготвен да започне политичка и економска соработка доколку Северна Кореја „направи само еден чекор кон денуклеаризација“, објави Ројтерс.
Претседателот на Јужна Кореја рече дека формирањето на „меѓукорејска работна група“ може да помогне во намалувањето на тензиите и да се решат прашањата, од економската соработка до обединувањето на семејствата разделени за време на Корејската војна од 1950 до 1953 година.
„Ќе започнеме политичка и економска соработка во моментот кога Северна Кореја ќе направи само еден чекор кон денуклеаризација. Дијалогот и соработката можат да доведат до значителен напредок во меѓукорејските односи“, рече тој.