Четворица индиски војници загинаа во размена на оган со бунтовниците кои се борат против индиската влада во регионот Кашмир, соопшти индиската армија, пренесува АП.
Војниците биле убиени кога врз нив пукале екстремисти кои се криеле во шумите во областа Дода во дивизијата Џаму во јужен Кашмир.
Владините сили ја пребаруваа областа врз основа на разузнавачки информации кога се случи престрелката, а ниедна бунтовничка група сè уште не ја презеде одговорноста за нападот.
Минатата недела, пет војници беа убиени во блискиот кварт Катуа, кога возилото во кое се наоѓаа беше нападнато од заседа од бунтовниците.
Во јуни девет лица беа убиени кога екстремисти отворија оган врз автобус со хинду аџии.
Бунтовничките групи се борат од 1989 година за независност од делот на Кашмир под контрола на Индија или за спојување со соседен Пакистан.
Мнозинството муслимани од Кашмир ги поддржуваат таквите цели на бунтовниците, според АП.
Њу Делхи инсистира дека бунтот во Кашмир е тероризам спонзориран од Пакистан, обвинение кое Пакистан го негира.
Во конфликтот досега се убиени десетици илјади цивили, бунтовници и владини сили.
Нуклеарно вооружените ривали Индија и Пакистан управуваат со делови од Кашмир, но и двете земји претендираат на територијата како целина.