Дејвид Камерон, британскиот министер за надворешни работи, објасни зошто борбените авиони на Кралското воздухопловство (РАФ) не соборуваат дронови над Украина, како што направија минатиот викенд над Израел за време на голем ирански напад.
Прашањето му беше поставено на Камерон за време на интервјуто за радиото ЛБЦ, кое потсетува дека британскиот премиер Риши Сунак потврдил дека борбените авиони на РАФ собориле голем број беспилотни летала чии цели биле на израелска територија минатиот викенд.
Израел соопшти дека Иран лансирал 170 беспилотни летала, повеќе од 30 крстаречки ракети и повеќе од 120 балистички ракети за време на нападот во саботата вечерта.
Камерон му рече на домаќинот дека РАФ нема да може да соборува беспилотни летала над Украина бидејќи доведувањето на силите на НАТО во директен конфликт со руските трупи ќе предизвика загрижувачка ескалација во руско-украинската војна.
– Направивме повеќе од која било земја поединечно за да им помогнеме на Украинците. Обучивме повеќе од 60.000 украински војници, први им дадовме противтенковско оружје, артилерија со долг дострел и тенкови – рече Камерон.
Тој го предупреди домаќинот за ризиците од користење на британските воени капацитети во директен конфликт со Русија.
– Мислам дека тоа што го предлагате е тешко остварливо затоа што ако сакате да избегнете ескалација во смисла на поширока европска војна, мислам дека едно нешто што треба да направите е да избегнете трупите на НАТО да влезат во директен конфликт со руските војници. Тоа би носело ризик од ескалација – рече Камерон.
Киев Индипендент пренесува дека министерот за надворешни работи на Велика Британија рекол дека „она што сега ѝ треба на Украина не се западни авиони на нејзиното небо“.
– Она што им е очајно потребно и што треба да им го дадеме е повеќе системи за противвоздушна одбрана – рече Камерон и додаде дека ова вооружување е „поефикасно“ во одбраната на Украина.
„Киев пост“ пишува дека Володимир Зеленски вчера побарал од сојузниците да го покажат истото „единство“ кога станува збор за Украина како што му покажаа на Израел, кој го одби иранскиот напад со поддршка од Западот.
– Интензитетот на руските напади бара поголемо единство. Со одбрана на Израел, слободниот свет покажа дека таквото единство не само што е можно, туку и 100% ефективно. Истото е можно и со одбраната на Украина, која исто како и Израел не е членка на НАТО, од терор – рече Зеленски.