Зградите на ирскиот јавен сервис RTE во Даблин беа евакуирани денес откако беше испратена дојава за бомба до таа медиумска куќа, како и до десетици други медиумски куќи во Ирска и Велика Британија.
Вработените и презентерите ги напуштија објектите во комплексот Донибрук, додека припадниците на ирската полиција (Гарда) излегоа на терен и започнаа со пребарување на зградите.
Како мерка на претпазливост, RTE привремено се префрли на емитување на претходно снимена програма.
Ирската полиција соопшти дека е свесна за заканите упатени до медиумските организации во Ирска и други европски земји и дека е започната истрага.
Властите изјавија дека се во контакт со ирските медиумски куќи и дека сите пријавени закани ќе бидат темелно истражени.
Според соопштението на RTE, постои можност истите луѓе зад заканата да се одговорни за серија лажни дојави за бомби што вчера влијаеја на најмалку 27 летови низ Европа, додека слични инциденти беа пријавени претходно во текот на неделата.
Меѓу летовите што беа засегнати од извештаите беа и некои летови на авиокомпаниите „Ер Лингус“ (Aer Lingus) и „Рајанер“ (Ryanair).
Ирската јавна радиодифузна служба соопшти дека безбедноста на вработените и соработниците е прв приоритет и дека редовното емитување на програмата ќе продолжи по консултација со полицијата.