Земјите од Европската Унија годишно губат приближно 59,3 милијарди евра даночни приходи поради префрлање на профитот на мултинационалните компании во јурисдикции со пониски даночни стапки, а околу 8 милијарди евра од тие загуби се поврзани со Велика Британија и нејзината мрежа на даночни раеви, според анализата на Мрежата за даночна правда.
Според податоците објавени од Euronews, Велика Британија, нејзините прекуокеански територии и крунски имоти се поврзани со приближно 13,6 проценти од вкупните даночни загуби на Европската Унија.
Анализата, објавена заедно со ажурирањето на Индексот на корпоративни даночни раеви на 5 ноември, се базира на податоци за 2022 година, последната година за која се достапни релевантни податоци.
Франција бележи најголеми проценети годишни загуби од 13,1 милијарди евра, додека Германија губи околу 11,8 милијарди евра.
Заедно, овие две земји сочинуваат 42 проценти од вкупните проценети даночни загуби на ЕУ.
Шпанија следеше со загуби од 4,8 милијарди евра, Полска со 4,7 милијарди и Белгија со 4,1 милијарда евра.
Италија годишно губи околу 3,6 милијарди евра, Холандија 3,5 милијарди, а Луксембург 3,2 милијарди евра.
Загубите надминуваат една милијарда евра во Ирска, Шведска и Австрија, додека најмалите се регистрирани во Литванија, Малта, Латвија, Естонија и Хрватска.
Според проценките на Мрежата за даночна правда, Франција е исто така земја од ЕУ со најголеми загуби поврзани со британската мрежа на даночни раеви, кои изнесуваат околу 2,8 милијарди евра, или 21,3 проценти од вкупните проценети загуби на земјата.
Во Германија, загубите поврзани со британската мрежа се проценуваат на 1,4 милијарди евра, додека во Луксембург тие изнесуваат 570 милиони, Шпанија 475 милиони, Полска и Италија по 438 милиони, а Белгија 415 милиони евра.