Веројатно ќе се откријат уште полоши злосторства во областите окупирани од руските сили од оние во Буча, предупреди украинскиот претседател Володимир Зеленски пред денешното обраќање пред Советот за безбедност на ОН.
„И ова е само еден град. Една од многуте заедници што Русите успеаја да ја окупираат. Сега има информации дека бројот на жртвите на окупаторите во Бородјанка и некои други ослободени украински градови може да биде уште поголем“, рече Зеленски, кој собира поддршка за отворање истрага за убиствата во Буча.
Бороѓанка е град на 25 километри западно од Буча.
Украинскиот претседател ја обвини Русија за „искривување на фактите“ за наводните грозоморни злосторства и рече дека „веќе започнува лажна кампања за прикривање на вината за масовните убиства на цивили во Мариупол“.
„Тие ќе направат десетици монтирани интервјуа, ќе уредуваат записи и ќе убиваат луѓе, особено за да изгледаат како некој друг да ги убил. Сега окупаторите веројатно ќе се обидат да ги сокријат трагите од нивните злосторства. Тоа не го направија во Буча кога се повлекоа. Но, можно е и во други области“, рече Зеленски.
Сè уште не е познат степенот на убиствата околу Киев, пишува Гардијан.
Главниот обвинител на Украина, Ирина Венедиктова, рече дека 410 тела на цивили биле пронајдени во пошироката област на Киев по повлекувањето на руските трупи, додека градоначалникот на Буча, Анатолиј Федорук, рече дека градот закопал 280 луѓе во масовни гробници бидејќи градските гробишта биле под артилериски оган.
Зеленски, кој вчера беше во посета на Буча, рече дека има информации дека повеќе од 300 луѓе биле убиени и мачени во градот.
Најлошиот конфликт во Европа во последните неколку децении, кој избувна по руската инвазија на Украина на 24 февруари, според украинските власти веќе уби 20.000 луѓе. Агенцијата за бегалци на ОН вчера објави дека повеќе од 4,2 милиони бегалци ја напуштиле земјата.
Кличко побара Европа да ги прекине трговските врски со Москва
Претходно, украинскиот министер за надворешни работи Дмитри Кулеба изјави дека доказите за убиствата на цивилите во Буча се само „врвот на ледениот брег“.
Говорејќи на заедничката прес-конференција со британската министерка за надворешни работи Лиз Трас, тој рече дека „ужасите во Буча, Мариупол и на други места“ бараат сериозни санкции од Г-7 и ЕУ.
Германскиот канцелар Олаф Шолц вчера изјави дека рускиот претседател Владимир Путин и неговите приврзаници „ќе ги почувствуваат последиците“ од настаните во Буча и дека западните сојузници ќе се договорат за воведување дополнителни санкции кон Москва во наредните денови.