Израелските сили денеска убија Палестинец во градот Хеброн на окупираниот Западен Брег, соопшти палестинското Министерство за здравство.
Министерството соопшти дека Палестинецот Насим Абу Фуда (26) бил убиен во Хеброн, кој често бил центар на судири меѓу израелската армија и Палестинците.
Убиството се случи во време на растечко насилство на Западниот Брег и Ерусалим и во времето на посетата на американскиот државен секретар Ентони Блинкен на регионот, јави Танјуг.
Израелската армија минатата недела нападна упориште на палестински милитанти во градот Џенин на Западниот Брег, при што уби девет лица, од кои повеќето милитанти, а Палестинците убија седум Израелци во еврејска населба во источен Ерусалим.
Израелската армија уби 35 Палестинци од почетокот на овој месец, во текот на првите недели од владеењето на новата израелска крајнодесничарска влада, која најави дека ќе заземе цврст став против Палестинците и ќе ја забрза изградбата на израелски населби.