Портпаролката на Министерството за надворешни работи на Русија, Марија Захарова, денеска ја оцени како „очигледна навреда“ препораката на германското Министерство за надворешни работи дека претставниците на Русија и Белорусија не се поканети на настаните по повод 80-годишнината од победата во Втората светска војна.
„Самиот факт дека идеолошките наследници и директните потомци на соработниците на Хитлер ќе ги избркаат Русите од настаните посветени на Победата е веќе очигледна навреда. Триумф на волјата, но оживување на нацизмот“, напиша Захарова на нејзиниот канал Телеграм, објави РИА Новости.
Таа така одговори на наводите на германскиот весник „Берлинер цајтунг“, кој повикувајќи се на затворен документ на германското Министерство за надворешни работи, објави дека Германија забранила поканување на руски и белоруски претставници на свечени настани на федерално, регионално и локално ниво, додавајќи дека институциите имаат право да избираат гости по сопствена дискреција.
Оваа година руските дипломати не беа поканети на настаните по повод 80-годишнината од ослободувањето на концентрациониот логор Аушвиц-Биркенау, што Москва го оцени како „богохулство“ и дел од пошироката антируска кампања за фалсификување на историјата на Втората светска војна.
Според официјалните податоци, за време на Втората светска војна, Советскиот Сојуз загубил околу 27 милиони луѓе, и воен персонал и цивили, што, според Риа Новости, претставува една од „најтрагичните страници на светската историја и клучниот придонес на СССР во победата над нацистичка Германија“, пренесува Танјуг.