Врховниот суд на САД и нареди на администрацијата на претседателот Доналд Трамп да го олесни враќањето на Салвадорец за кој владата призна дека по грешка го депортирала во Ел Салвадор.
Одлуката на судот уследи откако американското Министерство за правда побара од судиите да ја отфрлат наредбата издадена на 4 април од окружната судијка Пола Ксинис, која се обидуваше да го „олесни и спроведе“ враќањето на Килмарн Абрего Гарсија.
Судијата ја издаде наредбата како одговор на тужбата поднесена од Абрего Гарсија, мигрант од Ел Салвадор кој живеел во Мериленд и имал работна дозвола од 2019 година, и неговото семејство поради законитоста на неговото депортирање.
Депортиран поради сомневање за припадност на банда
Судот во непотпишаната одлука рече дека наредбата на судијата „бара од властите „да го олеснат“ ослободувањето на Абрего Гарсија од притворот во Ел Салвадор и да се погрижат неговиот случај да се третира како тој да не бил испратен во Ел Салвадор по грешка.
Администрацијата треба „да биде подготвена да сподели какви чекори презела и што има намера да преземе“, нареди судот.
Адвокатот на Абрего Гарсија, Симон Сандовал-Мошенберг, ја поздрави одлуката на судот, велејќи дека „победи владеењето на правото“.
„Врховниот суд ја поддржа одлуката на окружниот судија дека владата мора да го врати Килмар дома“, рече Сандовал-Мошенберг. „Сега треба да престанеме да губиме време и да го започнеме процесот.“
Абрега Гарсија беше запрен и приведен од страна на Имиграциските и царинските органи на САД на 12 март, по што беше испрашуван за наводни врски со банди.
Тој беше депортиран на 15 март на еден од трите летови за депортација во Ел Салвадор, во кој имало и наводни членови на венецуелски банди.
Над 200 луѓе беа депортирани во Ел Салвадор
Одделот за правда соопшти дека наредбата на судијата администрацијата на Трамп да го „изврши“ враќањето е недозволиво пречекорување на претседателските овластувања во надворешните работи и кршење на американската уставна поделба на судската и извршната власт.
„САД не управуваат со суверената нација Ел Салвадор, ниту можат да ја принудат да се усогласи со одлуката на федералниот судија“, соопшти Министерството.
На 15 март, администрацијата на Трамп депортираше повеќе од 200 луѓе во Ел Салвадор, каде што беа држени во голем антитерористички затвор, според договорот според кој САД и плаќаат на владата на претседателот Најиб Букеле 6 милиони американски долари.
Абрего Гарсија е оженет со американска државјанка со кој има дете, кое исто така е американски државјанин, како и две деца од претходниот брак.
Тој никогаш не бил обвинет за кривично дело, според неговите адвокати, кои ги негираа наводите на Министерството за правда дека тој е член на бандата МС-13.
„Беше депортиран поради административна грешка“
Министерството за правда во писмото до Врховниот суд на 7 април рече дека додека Абрего Гарсија бил депортиран во Ел Салвадор по „административна грешка“, неговото отстранување од САД „не било грешка“.
Грешката, велат адвокатите на министерството, е што тој бил сменет во Ел Салвадор, и покрај заштитата од налогот за депортација што Абрего Гарсија ја доби во 2019 година, кога судијата одлучи дека ако се врати во својата земја, ќе биде гонет од банди.
Министерството за правда соопшти дека Абрего Гарсија, обвинет дека е член на бандата МС-13, повеќе не може да ја има таа заштита бидејќи администрацијата на Трамп го назначи МС-13 како странска терористичка организација.
Во својата одлука, Ксинис заклучи дека неговото отстранување и притвор биле „целосно незаконски“ и дека „нема законска основа за негово апсење, притвор или депортација“.