САД, Австралија, Канада и Филипините денеска одржаа заеднички воздушни и поморски воени маневри во спорното Јужно Кинеско Море, додека Кина одговори велејќи дека извршила воздушни и поморски борбени патроли во истиот регион.
Во заедничкото соопштение на воените претставници на четирите земји се наведува дека „акцијата ќе биде спроведена на начин што е во согласност со меѓународното право и со почитување на безбедноста на пловидбата и правата и интересите на другите држави“.
Еден филипински воен претставник рече дека морнаричките бродови и борбените авиони ќе спроведуваат вежби против подморници, како и комбинирани маневри.
Кина долго време претендира на голем дел од Јужното Кинеско Море, главна глобална трговска морска рута, и рече дека ќе ги брани своите територијални интереси по секоја цена.
Нејзините тврдења се преклопуваат со оние на помалите приморски држави, како што се Филипините и Виетнам, бидејќи го попречуваат нивниот пристап до риболовните терени, како и истражувањето на нафта и гас во нивните меѓународно признати економски зони.
Непријателствата во спорните води особено ескалираа меѓу кинеската и филипинската крајбрежна стража и поморските сили во изминатата година, што ги зголеми стравувањата дека судирите би можеле да прераснат во поголем вооружен конфликт во кој ќе бидат вклучени САД, долгогодишен сојузник на Филипините.