Во украинското гранатирање на руската област Белгород, еден цивил загина, а двајца се повредени, изјави гувернерот Вјачеслав Гладков.
Гладков во објава на Телеграм наведува дека информациите се прелиминарни и дека бројот на жртви може да биде поголем, пренесува Анадолија.
„Мажот бил во автомобилот кога го удрил шрапнел, од здобиените рани починал пред да пристигне брзата помош. Две лица се ранети“, рече тој.
Гладков додаде дека во украинското гранатирање биле погодени 12 станбени згради, 16 автомобили, две градинки и едно училиште.
Министерството за вонредни ситуации соопшти дека четворица работници на итната помош се повредени во градот Горловка, во областа Доњецк.
„Синоќа при гранатирање од страна на украинските вооружени сили, централното градско подрачје Горловка беше опожарено. Противпожарната служба брзо пристигнала на местото на настанот. При гаснењето на пожарот неколку пати од дронот бил фрлен експлозивен предмет, а персоналот успеал да оди во прифатилиштето“, се наведува во соопштението.
Евакуација на деца
Русија планира да евакуира околу 9.000 деца од пограничната област бидејќи Украина постојано ја гранатира, изјави локален претставник.
Децата ќе бидат преместени од Белгородската област поисточно, далеку од украинската граница, изјави Гладков во вторникот.
Најавата дојде еден ден откако рускиот претседател Владимир Путин рече дека Кремљ сака да создаде тампон зона за заштита на пограничните региони од далечни украински напади и прекугранични напади кои зачестија во последните месеци.
Украина ја искористи својата огнена моќ со долг дострел за да ги гаѓа нафтените рафинерии и магацини длабоко во Русија и се обиде да ги раздвижи пограничните области на Русија, вршејќи политички притисок врз Путин.
Покрај тоа, руските противници на Путин и на Кремљ со седиште во Украина извршија прекугранични напади.