Почнувајќи од петок, Кина ќе ја забрани продажбата на дронови во Пекинг и ќе воведе задолжителни дозволи за нивна употреба, објавија официјални лица.
Според новите правила, дроновите и клучните компоненти нема да можат да се продаваат, изнајмуваат или внесуваат во кинескиот главен град, објавува Би-Би-Си.
Од 1 мај, сопствениците ќе мора да ги регистрираат своите уреди во полицијата.
Сите летови со дронови на отворено ќе бараат претходно одобрение, а корисниците ќе треба да завршат онлајн обука и да поминат регулаторен тест.
Исклучоци ќе постојат само за одобрени цели како што се борба против тероризмот или спасувачки операции.
Доколку дронот се испраќа на поправка надвор од Пекинг, сопствениците ќе мора да го земат лично, наместо да им биде доставен.
Кина постепено ја заострува регулацијата на дронови во последниве години, наведувајќи ја безбедноста во воздушниот простор на ниска надморска височина.
Претставникот на Националниот конгрес на Пекинг, Сјонг Џингхуа, рече дека целта е да се најде најдобрата рамнотежа помеѓу безбедноста и технолошкиот напредок.
Иако кинеските компании како DJI доминираат на глобалниот пазар, земјата станува едно од најтешките места за управување со дронови.
Според властите, во Кина се регистрирани повеќе од три милиони дронови.
Новите мерки би можеле да имаат значително влијание врз пазарот, а продавниците на DJI во Пекинг веќе ги отстрануваат дроновите и сродната опрема од своите полици.