Во Куманово денес ќе се одржи протест по повод смртта на малиот Алмир

Под мотото „За правда”, денес во Куманово со почеток во 15 часот,  невладината организација ‘Зани” ќе организира протестен марш на кој ќе биде побарано целосно расветлување на случајот во кој загина четиригодшниот Алмир Алиу од Куманово. Протестот ќе започне пред средното училиште „Сами Фрашери“ и ќе заврши пред Основен Суд, односно пред Полициската станица и Општина Куманово.

Како што стои во соопштението на НВО  “Зани”, на протестниот марш ќе се изрази „револтот против грозниот чин на убиството на Алмир. Овој протест се одржува со намера да се крене гласот против сите оние кои се обидуваат да ја убијат нашата иднина, нешто што никогаш нема да го дозволиме. Секој кој извршил такво дело треба да бидат казнет со максимална казна“, велат од невладината организација.

Организаторите на протестот повикаа на мирен и демократски марш и побараа овој револт да не се користи за меѓуетнички тензии. Во исто време, и семејствата Илиќ и Алиу повикаа на разум и максимална казна за сторителот.

Инаку, случајот со смртта на четиригодишниот Алмир предизвика бурна реакција на социјалните мрежи, кога после прегазувањето пред Здравствениот дом во Куманово, малиот Алмир почина на клиниките во Скопје.

Против Бојан Илиќ е поднесена кривична пријава за обид за насилство и обид за убиство, а сега ќе одговара и за убиство.