Во рамки на Европската недела на имунизација (19–25 април), денеска на градскиот плоштад во Куманово се одржа настан посветен на подигнување на свеста за значењето на вакцинацијата.
Медицински лица делеа флаери и ги информираа родителите за придобивките од имунизацијата, додека на децата им беа поделени маички и балони.
Началникот на превентива при Здравствениот дом Куманово, д-р Валентина Богоевска Димитриевска, истакна дека вакцинацијата е клучна за сите возрасни групи.
„Оваа недела е недела на имунизација од 19-ти до 25-ти април и тоа европска недела на имунизација каде сите додатно нели од она што го работиме секојдневно даваме апел и апелираме колку е важно вакцинирањето на децата и не само на децата туку на сите генерации“, изјави таа.
Таа нагласи дека имунизацијата има пошироко значење за целото општество.
„Оваа година мотото на оваа недела на имунизација е вакцините ги заштитуваат сите генерации така да од раѓање до средна доба па и после повозрасните, сите можат да примат вакцини да бидат заштитени“, посочи Богоевска Димитриевска.
Во текот на неделата, како што информираше, биле спроведени и теренски активности.
„Вчера бевме во ромската населба Средорек каде што опфативме дечиња коишто не се редовно имунизирани наидовме на добар одѕив“, рече таа.
Според неа, и покрај активностите, кај дел од вакцините опфатот не е на посакуваното ниво.
„Малку сме тука со МРП вакцината којашто некако се избегнува меѓутоа ние како медицински лица работиме и на тоа објаснуваме“, додаде Богоевска Димитриевска.
Од Здравствениот дом Куманово потенцираат дека вакцинацијата е континуиран процес и дека ќе продолжат со активности за едукација и информирање на граѓаните.
Никола Ивановски