Руските сили се немилосрдни во обидот да ги заземат источните украински градови Бахмут и Авдивка, но не постигнуваат напредок, соопшти во средата украинската војска, додека промосковски функционер рече дека Русите напредуваат.
Тие два града, заедно со другите блиски места во индустрискиот регион Доњецк, се во епицентарот на руските напади, се вели во соопштението на главниот штаб на украинските вооружени сили.
„Непријателот продолжува да го напаѓа градот Бахмут. Сепак, нашите бранители храбро го држат градот, одбиваат бројни непријателски напади“, соопшти Генералштабот, додавајќи дека украинските сили одбиле 57 руски напади врз Бахмут и други градови.
Британското Министерство за одбрана соопшти дека руските сили постигнале само „маргинален напредок“ во обидот да ја опколат Авдиивка и изгубиле многу оклопни возила и тенкови.
Но, Денис Пушилин, лидерот назначен од Русија на делот од регионот на Доњецк, кој е под контрола на Москва, рече дека повеќето украински сили се повлекле од фабриката за метал во западен Бахмут и дека руските сили напредуваат.
Ројтерс не беше во можност да ги потврди тие тврдења на терен.
Додека напредните западни борбени тенкови почнаа да пристигнуваат во Украина пред очекуваната контраофанзива на нејзините сили, руската новинска агенција РИА објави дека Москва испратила стотици нови и обновени тенкови на своите војници.