Ученик застрела и уби двајца вработени во училиштето и рани уште двајца, вклучувајќи и 11-годишно девојче, во најновото пукање во училиште што го потресе Бразил во вторник, јавува АФП.
Тринаесетгодишно момче е уапсено во врска со нападот во училиштето Сао Хозе во Рио Бранко, главен град на државата Акре, соопштија локалните власти.
Повреденото девојче е рането во ногата.
Уапсеното момче, кое е ученик во училиштето, влегло во зградата и испукало неколку куршуми во ходник што води до канцеларијата на директорот, изјави за новинарите полицаецот Фелипе Русо.
По нападот, тој се предал на полицијата.
Уапсен е и неговиот очув, сопственик на пиштолот што бил употребен во нападот.
Полицијата идентификувала други ученици кои можеби соработувале со напаѓачот, додаде Русо.
Учениците избегаа преку ѕидот висок шест метри
Едуардо Родригес Кавалканте, рецепционер во хотелот до училиштето, ја опиша застрашувачката глетка на учениците кои се обидоа да скокнат преку ѕидот што го дели училиштето од хотелот.
„Ѕидот е висок шест метри и само едно лице успеа да го прескокне и да се засолни тука во хотелот. Другите останаа на покривот на училиштето во обид да избегаат“, рече 19-годишниот рецепционер, додавајќи дека слушнал „истрели и многу врескање“.
Фотографиите објавени од локалните медиуми покажуваат жена како се евакуира на носилка и луѓе кои плачат и се гушкаат пред училиштето.
„Соочени со оваа трагедија, државата изразува најдлабоко сочувство до семејствата на жртвите, училиштето Сао Хозе и сите образовни работници погодени од овој настан“, соопшти државната влада.
Таа додаде дека наставата е прекината три дена во сите училишта во сојузната држава и дека се мобилизирани мобилни тимови за психолошка поддршка за да им помогнат на учениците и наставниците.
Бразил бележи нагло зголемување на нападите врз училишта
Во последните години, има нагло зголемување на нападите врз образовни институции во Бразил.
Двајца тинејџери беа застрелани и убиени во септември 2025 година, а тројца други беа ранети во училиште во североисточната држава Сеара.
Еден 17-годишник беше убиен, а тројца други беа ранети во октомври 2023 година во пукотница во училиште во Сао Паоло.
Непосредно пред тоа, еден тинејџер беше убиен, а тројца други беа ранети во напад со нож додека излегуваа од училиште во југоисточната држава Минас Жераис.
Во април истата година, 25-годишен маж влезе во градинка во јужната федерална држава Санти Катарини и со секира уби четири деца на возраст меѓу три и седум години.