Денеска специјалните единици на италијанските карабинери ја уапсија Росалија, сестрата на неодамна уапсениот шеф на „Коза ностра“ Матео Месина Денаро, под обвинение за мафијашко здружување.
Истрагата ја координирало обвинителството во Палермо, а според истражителите, Росалија со години му помагала на својот брат да избегне апсење.
Деталната белешка за здравјето на Денаро, напишана од неговата сестра Росалија и скриена во шуплината на столот, им ја дала на инспекторите информациите што довеле до апсење на мафијашкиот бос.
Тие белешки полицијата ги открила при поставување на слушалки во станот на Росалија, соопшти денеска АНСА.
Анализата на дигиталната здравствена евиденција ги навела инспекторите до посета закажана во клиниката Ла Мадалена на 16 јануари оваа година за пациент од рак, што доведе до апсење на Денаро.
Денаро беше уапсен во приватна болница во Палермо, каде што се лекуваше од рак по 30 години бегство.
Тој претходно беше осуден во отсуство на околу 20 доживотни затворски казни за неговата улога во низа убиства, вклучително и бомбашките напади во 1992 година во кои беа убиени обвинителите против мафијата Џовани Фалконе и Паоло Борселино.
Обвинителите рекоа дека Денаро е способен да одлежи затворска казна, и покрај неговата болест.