Трите главни германски партии, СПД, ЦСУ и АфД, се состануваат денеска за да ги финализираат своите изборни програми и да се договорат за кандидатите пред националните избори на 23 февруари.
Левичарската Социјалдемократска партија (СПД) се состанува на партиска конференција во главниот град Берлин, каде што планира да го потврди канцеларот Олаф Шолц како главен кандидат и да усвои изборен манифест.
На конференцијата, која ќе трае околу пет часа, Шолц треба да одржи говор пред 600 делегати.
Канцеларот се соочува со тешка задача да ги придобие гласачите за себе и за својата партија, која моментално е на третото место зад конзервативните Демохристијани (ЦДУ) и екстремно десничарската Алтернатива за Германија (АфД).
ЦДУ заседава зад затворени врати
АфД, исто така, денеска треба да се собере во источниот германски град Риеза на дводневна конференција, каде што планира да ја номинира лидерката на партијата Алиса Вајдел за главен кандидат на изборите.
Екстремно десничарската партија сè уште треба да разјасни некои точки од својата изборна програма, за теми како Русија, Европската унија и семејната политика.
Противниците повикаа на протести против АфД во Риеза, град кој се наоѓа на 130 километри јужно од Берлин, а организаторите очекуваат да присуствуваат повеќе од 10.000 луѓе.
Во меѓувреме, извршниот комитет на конзервативната ЦДУ треба да заврши дводневен состанок зад затворени врати во Хамбург во северна Германија.
Фридрих Мерц, лидер на ЦДУ и кандидат за канцелар, на прес-конференција ќе ги презентира резултатите од средбата.