Американскиот претседател Доналд Трамп изјави дека негов главен приоритет во односите со Кина е обезбедување фер трговски договор, но не планира да разговара со кинескиот претседател Си Џинпинг оваа недела.
Трамп им рече на новинарите во претседателскиот авион дека американските претставници разговараат за трговски договори и други прашања со многу земји, вклучително и Кина, објави денес Ројтерс.
На прашањето дали ќе бидат објавени трговски договори оваа недела, Трамп рече дека тоа „многу лесно може да се случи“, но не даде повеќе детали.
Високите функционери на Трамп имаа серија состаноци со трговските партнери откако тој воведе царини од 10 проценти за повеќето земји на 2 април, заедно со повисоки царини за многу трговски партнери, кои потоа ги суспендираше 90 дена.
Тој, исто така, воведе царини од 25 проценти за автомобили, челик и алуминиум, 25 проценти за Канада и Мексико и 145 проценти за Кина.
Тој посочи дека не очекува да постигне договор со некои земји, туку дека наместо тоа би можел „да утврди одредена тарифа“ за тие трговски партнери во следните две до три недели.