Американскиот претседател Доналд Трамп најави дека ќе воведе нови царини од 25 отсто за увоз на граѓа и производи од дрво во следниот месец или порано, откако претходно изјави дека планира да воведе царини за увоз на автомобили, полупроводници и фармацевтски производи.
Трамп им рече на новинарите на „Ер Форс 1“ дека планира царини од 25 отсто за увоз на граѓа и производи од дрво да стапат на сила на почетокот на април, кога тој исто така очекува да воведе царини за увоз на автомобили во приближно ист износ, пренесува Танјуг, повикувајќи се на Ројтерс.
Тој посочи дека САД ќе генерираат големи приходи од царините, но понуди и одложување на воведувањето тарифи доколку другите земји ги намалат или укинат сопствените давачки за увоз на американски стоки.
Царината од почетокот на мандатот
Трамп претходно изјави дека има намера да воведе слични тарифи за увоз на полупроводници и фармацевтски производи, првично од 25 проценти или повеќе, а потоа значително да се зголемуваат во текот на годината.
Американскиот претседател не кажа точно кога ќе ги воведе овие царини.
Трамп воведе дополнителни царини од десет отсто на целиот увоз од Кина бидејќи, како што наведе, Пекинг не успеал да ја запре трговијата со фентанил.
Тој исто така најави, а потоа одложи за еден месец, царини од 25 отсто за увоз на стоки од Мексико, како и за увоз од Канада, освен за енергетски производи.
Трамп минатата недела рече дека планира да воведе реципрочни тарифи за сите земји кои имаат царини за американски стоки или имаат поставено нетарифни бариери за да го ограничат американскиот пристап до нивните пазари.