Претседателот на Соединетите Американски Држави, Доналд Трамп, изјави дека американските воздушни напади врз Иран ќе продолжат во наредните денови, со предупредување дека ќе бидат поинтензивни доколку Техеран не се согласи со договорот, додавајќи дека во моментов не сака да преговара со Иран.
Во исто време, американскиот претседател изјави дека контактите меѓу двете страни не се прекинати и дека иранските претставници сè уште се обидуваат да постигнат договор.
„Пораката беше едноставна – мора да постигнете договор или немате ништо друго“, рече Трамп во среда, додавајќи дека верува оти Иран нема друг избор освен да преговара.
Трамп, во интервју за Фокс њуз, рече дека американските сили ќе продолжат со нападите „сè додека не проценат дека е доста“, оценувајќи дека воените капацитети на Иран се сериозно ослабени.
„Единствениот начин да се преговара со нив е преку демонстрација на воена сила“, рече Трамп.
Тој изјави дека главните цели на американската операција се спречување на Иран да развие нуклеарно оружје, зачувување на слободната пловидба низ Ормутскиот теснец и дополнително слабеење на воените капацитети на Иран.
Американскиот претседател тврди дека дури и ако нападите веднаш престанат, на Иран ќе му бидат потребни децении за да ја обнови својата уништена воена инфраструктура.
Зборувајќи за можните следни цели, Трамп рече дека енергетската инфраструктура на Иран засега не е цел, но ниту таа опција не е исклучена.
„Ја оставам енергетската инфраструктура за крај. Ќе ги удриме многу силно вечерва, исто ќе биде и следните ноќи, а следната недела ќе биде уште полошо ако не седнат на преговарачка маса“, рече Трамп, наведувајќи дека електраните и мостовите би можеле да бидат меѓу потенцијалните цели.
Кога беше прашан за можноста за копнена операција, Трамп не сакаше да даде детали, но рече дека има „други кои можат да водат таква кампања“.
Трамп оцени дека договорот за нуклеарната програма на Иран, постигнат за време на администрацијата на поранешниот американски претседател Барак Обама, е „безвреден документ“ кој, тврди тој, довел до развој на нуклеарно оружје.
Тој рече дека американските разузнавачки служби внимателно ги следат сите познати ирански нуклеарни објекти, вклучително и локација за која во последните денови се шпекулираше дека е дел од нуклеарната програма, предупредувајќи дека ќе биде нападната доколку се открие каква било значајна активност.
Зборувајќи за поморскиот сообраќај низ Ормутскиот теснец, Трамп рече дека преминот е отворен за меѓународен превоз, но е блокиран за ирански бродови.
Во интервју за американската телевизија, тој изјави дека првично мислел дека е можна промена на владата во Иран, потсетувајќи на говорот од 28 февруари, кога, најавувајќи го почетокот на американско-израелската воена операција против Иран, ги повика Иранците да ја преземат контролата врз својата земја по завршувањето на бомбардирањето.
Кога беше прашан дали навистина верува дека може да има промена на режимот во тоа време, Трамп одговори потврдно, наведувајќи дека не очекува иранските власти да бидат подготвени да употребат сила против сопственото население.