Генералниот секретар на НАТО Јенс Столтенберг го повтори својот повик до Турција и Унгарија да им дозволат на Финска и Шведска да се приклучат на западната воена алијанса.
„Време е да се ратификуваат и целосно да се поздрават и Финска и Шведска како членки“, рече Столтенберг вчера во Хелсинки, зборувајќи заедно со финската премиерка Сана Марин.
Столтенберг рече дека е постигнат напредок со Турција и дека претставниците на Анкара, Стокхолм и Хелсинки ќе се сретнат следната недела во Брисел.
Двете нордиски земји поднесоа барање за членство во одбранбената алијанса во мај, по руската инвазија на Украина.
Пристапувањето на новите членки мора да биде ратификувано од сите сојузници, а Турција веќе неколку месеци го блокира тој процес и бара законски измени бидејќи, како што тврди, Шведска сочувствува и ги поддржува курдските терористи.
Столтенберг рече дека и двата кандидати за НАТО ги исполниле условите од договорот со Анкара од минатото лето.
Нордиските земји ќе бидат на многу подобро место отколку пред да се потпишат, рече шефот на НАТО, додавајќи дека е незамисливо да има каква било закана против Финска или Шведска без реакција од НАТО.
Финска и Русија ја делат границата долга повеќе од 1.300 километри.
Марин рече дека Финска одлучила да аплицира за членство во НАТО бидејќи границата на алијансата е единствената линија што Русија не би ја преминала.
Финската премиерка рече дека се надевала дека Финска веќе ќе биде членка, а сега очекува пристапниот процес да биде завршен пред следниот самит на НАТО во Вилнус во јули.
Марин истакна дека унгарскиот парламент допрва треба да го одобри проширувањето на НАТО, но Будимпешта ја изрази својата поддршка за пристапување и не постави никакви барања. Парламентот во Хелсинки утре треба да расправа и да гласа за ова прашање.
Столтенберг рече дека членките на НАТО се согласиле Украина да стане членка на алијансата во иднина, но дека сега фокусот е да му помогне на Киев да се одбрани од руска инвазија.
– Руската инвазија на Украина трајно го промени односот на НАТО со Москва. Нема враќање назад, нагласи Столтенберг.
Тој ги повика сојузниците да учат од зависноста на Европа од рускиот гас и ги предупреди да не станат премногу зависни од Кина.
„Не треба да ја правиме истата грешка со Кина и другите авторитарни режими“, заклучи тој.