Сирија ќе учествува на самитот на Г7 во Франција следниот месец како земја-гостин, а ќе биде претставувана од претседателот Ахмед ал-Шара, соопштија три извори запознаени со прашањето.
Ова ќе биде прво учество на Сирија на самитот на групата од нејзиното основање во 1975 година, објави Ројтерс.
Поканата на Ал Шара за учество на самитот, кој ќе се одржи од 15 до 17 јуни во Евиан-ле-Бен во југоисточна Франција, му беше лично доставена на сирискиот министер за финансии Џиср Барниех, кој присуствуваше на финансиските разговори на групата во Париз претходно оваа недела, рече еден од изворите.
Сириски функционер рече дека учеството на Сирија во разговорите веројатно ќе се фокусира на улогата на земјата како „потенцијален стратешки центар за синџири на снабдување“ по затворањето на Ормутскиот теснец.
Поморскиот сообраќај низ теснецот е во голема мера суспендиран откако избувна војната со Иран кон крајот на февруари, потресувајќи ја глобалната економија.
Сирија, која излезе од 14-годишната граѓанска војна како сојузник на Западот, се обидува да ја обнови економијата уништена од годините конфликти и санкции, објави Танјуг.
Иако повеќето санкции воведени за време на владеењето на поранешните претседатели Хафез и Башар ал-Асад оттогаш се ублажени, привлекувањето странски инвестиции и враќањето на нормалните банкарски врски се покажаа како побавно и потешко отколку што очекуваа многу функционери, соопшти агенцијата.