Нафтоводот Дружба, кој беше затворен по падот на залутаните ракети во Полска, најверојатно наскоро ќе биде рестартиран бидејќи самиот нафтовод не е оштетен, објави денеска унгарскиот министер за надворешни работи Петер Сијарто во видео објавено на неговата Фејсбук страница.
Сијрото, по разговорот со полскиот министер за надворешни работи, исто така рече дека Унгарија чека дополнителни информации од Варшава за резултатите од нивната истрага за експлозијата што се случи во Полска во близина на границата со Украина, пренесува Ројтерс.
Снабдувањето со нафта за делови од Источна и Централна Европа преку нафтоводот Дружба беше привремено прекинато во вторникот, објавија операторите на гасоводот во Унгарија и Словачка.
Унгарскиот МОЛ објави дека бил информиран од својот украински партнер дека руска ракета ја погодила електраната во близина на границата со Белорусија, која ја снабдува со електрична енергија пумпната станица на Дружба, што довело до застој.
Словачка Транспетрол исто така потврди дека протокот на нафта е прекинат, наведувајќи „технички причини на украинската страна“, но без да го спомене ракетниот напад.
„Некако охрабрувачка е вест дека, според сегашните информации, самиот нафтовод Дружба не е оштетен, туку само еден елемент од инфраструктурата што управува со гасоводот, а тоа е електраната“, рече Сијарто.
Тој додаде дека „поправката на тој елемент е очигледно полесна работа отколку да бил зафатен самиот цевковод… така што веројатно може да се направи за кратко време, во зависност од дефектите што се констатираат при техничкиот дел од работата. .
Сијарто повтори дека Унгарија има резерви на нафта веќе неколку месеци и дека снабдувањето на земјата не е загрозено.
Сите информации за економско-енергетската криза во Македонија, регионот и светот можете да ги прочитате ТУКА.