Почна реконструкцијата на подрачното училиште „Кирил и Методиј“ во Агино село, Кумановско, соопштија денеска надлежните од општина Куманово.
– Во тек е целосна реконструкција на ООУ „Кирил и Методиј“ – подрачно училиште Агино село.
Проектот е во реализација на Министерството за образование и наука, во соработка со Општина Куманово, информираше градоначалникот на Куманово Максим Димитриевски.
За реконструкцијата на ова подрачно училиште ресорното министерство одвои над 8, 2 милиони денари (8. 227. 573,60).
Компанијата која е избрана на тендерот веќе е на терен и работи на покривот на училиштето.
Родителите на учениците од подрачното училиште „Кирил и Методиј“ од кумановското Агино село лани не ги пуштаа учениците на настава на први септември во знак на револт бидејќи училиштето не е реконструирано со децении.
Тогаш тие бараа да се реализира реконструкцијата на објектот, изграден 1977-78 година.
Во меѓувреме во општина Куманово се реконструира уште подрачното училиште „Браќа Миладиновци“ во село Пчиња, проект на општина Куманово. – Изминатиов период се реновираа голем број училишта.
Во централното градско подрачје веќе се завршени како средните, така и основните.
Сепак, во Куманово има вкупно 49 училишни објекти, остануваат да се реконструираат училишни згради во рурални средини.
Куманово постојано аплицира за проекти за реконструкција до МОН, чекаме и нов повик на кој исто така ќе аплицираме, изјави раководителот на секторот за образование од општина Куманово, Александар Јовановиќ.
Досега се реконструирани повеќе од половина училишни објекти во Куманово и дел од селата.
МИА