Делегациите на Русија и Украина треба да учествуваат во преговорите во Абу Даби денес, со посредство на Соединетите Американски Држави (САД), што е прва ваква средба од февруари минатата година.
Како што објави британската агенција Ројтерс, ова се случува по изјавата на американскиот претседател Доналд Трамп дека мировен договор е можен и дека би ја вклучил европската безбедност.
Неколку европски земји, вклучувајќи ги Франција и Германија, како и Европската комисија, испратија претставници во Абу Даби.
Русија, сепак, јасно стави до знаење дека не сака учество на Европејците во преговорите со Украина насочени кон прекин на конфликтот, кој сега е во својата петта година.
Војната започна во февруари 2022 година со она што Москва го нарече „специјална воена операција“ во Украина, која Киев и неговите сојузници ја опишуваат како руска инвазија.
Киев изјави дека планира одделни состаноци со претставници на своите европски сојузници, со цел да ги информира за напредокот на преговорите.
Почетокот на трилатералниот состанок, на кој учествуваат Вашингтон, Москва и Киев, е закажан за рано наутро.
„Правиме сè што е во наша моќ за да обезбедиме Европа да биде учесник во дипломатскиот процес“, изјави во понеделник украинскиот главен преговарач Рустем Умеров.
Од руска страна, заменик-министерот за надворешни работи Сергеј Рјабков и високиот воен офицер Јуриј Жигарловски ќе учествуваат во преговорите за прв пат.
Делегацијата испратена од Москва повторно ја предводи советникот на Кремљ, Владимир Медински.