Русија побара од Советот за безбедност на ОН да започне меѓународна истрага за вмешаноста на Вашингтон во наводниот развој на биолошко оружје во Украина, соопшти руското Министерство за надворешни работи.
„Русија нема друг избор освен да поднесе жалба до претседателот на Советот за безбедност на ОН за да побара покренување меѓународна истрага“ за „американските воени биолошки активности на украинска територија“, се вели во соопштението.
Се наведува дека кон жалбата била приложена соодветната предлог-резолуција.
Набргу по почетокот на офанзивата во Украина на крајот на февруари, Русија ги обвини САД за финансирање на програмата за биолошко оружје во Украина, тврдејќи дека докази за тоа биле пронајдени во украинските лаборатории.
Според руското Министерство за одбрана, целта на овие истраги е да се создаде механизам за тајна дистрибуција на смртоносни материи.
Москва постојано ги повторуваше тие обвинувања на состаноците на Советот за безбедност на ОН.
САД и Украина го негираа постоењето на лаборатории за производство на биолошко оружје во земјата.
Веќе во 2018 година, Русија ги обвини САД дека тајно спроведуваат биолошки истражувања во лабораторија во Грузија, друга поранешна советска република, која, како Украина, има желба да стане членка на НАТО и ЕУ.
Оправдувајќи ја својата офанзива, Москва, исто така, оцени дека Украина има намера да развие нуклеарно оружје, идеја што ја напушти во 1990-тите.
Сите информации поврзани со најновите случувања со војната во Украина можете да ги прочитате ТУКА.