Лабуристичката партија освои мнозинство гласови на парламентарните избори во Обединетото Кралство, а нејзиниот лидер Кир Стармер ќе стане нов премиер на земјата, јавува Би-би-си на српски јазик.
Конзервативците ја напуштаат власта по 14 години, а за време на нивното владеење пет нивни политичари ја извршуваа премиерската функција.
Во раните утрински часови, Риши Сунак, премиерот во заминување, го призна поразот и рече дека му се јавил на Стармер за да му честита.
„Успеавме“, беше пораката на Стармер до навивачката толпа.
Во својот победнички говор, лидерот на лабуристите вети „национална обнова“ и рече: „Прво земјата, а потоа партијата“, алудирајќи на приоритетите на неговата идна влада.
На говорницата имаше табла на која пишуваше „Промените почнуваат“.
Роберт Бакланд, поранешен конзервативен министер, ги опиша резултатите како „изборен Армагедон“ за партијата на Сунак.
Лабуристите се очекува да имаат 410 пратеници, 170 повеќе од потребното мнозинство во парламентот, што е неверојатен пресврт од претходните избори во 2019 година, кога го постигнаа својот најлош изборен резултат од Втората светска војна.
За мнозинство се потребни 326 пратеници, што лабуристите го надминаа.
Ова е најдобар резултат на лабуристите од Тони Блер, кога на изборите во 1997 година ја победија својата ривалска партија за 179 места.
Конзервативците на премиерот во заминување Сунак, според проценките, ќе можат да сметаат на нешто повеќе од 110 места во парламентот, што би можело да биде најмалиот број пратеници од ториевците во повоената историја.
Либерал-демократите би освоиле 58 пратенички места, како трета најсилна партија.
Успех постигнаа и Најџел Фараж и неговата партија Reform UK, која за прв пат ќе има пратеници во парламентот – засега четворица.
„Ова е само првиот чекор од нешто што ќе ве запрепасти сите“, рече Фараж.
Во споредба со другите земји, промената на власта во Британија се движи брзо.
Откако ќе се потврдат резултатите, истиот ден Риши Сунак ќе ја напушти Даунинг стрит 10, седиштето на британската влада и премиерот во Лондон, а Стармер брзо ќе се пресели.