Тече изработката на Генералниот урбанистички план за општина Куманово, информираа денеска надлежните од ЈП „Куманово план“.
Претпријатието ја изработило инвентаризацијата на изградениот градежен фонд, доставена е до општинскиот сектор за урбанизам, по што е доставено до Агенцијата за планирање на просторот.
– Изработката на Генералниот урбанистички план е неопходен за градот. Добро се познати бенефитите кои ќе ги имаат граѓаните, градот, каков ќе биде развојот со изработката на ГУП. Како претпријатие ја изработивме инвентаризацијата на изградениот градежен фонд, вкупната физичка структура на земјиштето и зеленило во рамки на планскиот опфат на ГУП-от за општина Куманово-прва фаза. Согласно трипартитниот договор помеѓу општина Куманово, Министерството за транспорт и врски и Агенцијата за просторно планирање веќе е предадена до секторот за урбанизам и треба да се достави до Агенцијата. Во зависност од тоа за колку време ќе се завршат обврските во Агенцијата, согласно договорот го очекуваме на завршна доработка кај нас, изјави директорката на ЈП „Куманово План“, Анета Шандева Доневска.
Планската програма за новиот ГУП на Куманово претходно беше одобренa со што официјално е отпочната постапката за донесување на нов ГУП. Општината ja доставила планската програма до Агенцијата за планирање на просторот која треба ја подготви документациската основа и нацрт фазата за самиот план. Општината ги обезбедува потребните студии и елаборати, обезбедена е хидролошката, студија за урбано зеленило и во февруари ќе почне тендерска постапка за студија за стабилност на земјиштето за планскиот опфат кој се проширува.
-По завршување на обврските согласно трипартитниот договор ги има Агенцијата и општината повотрно ќе биде вратен во „Куманово план“ и од претпријатие се надеваат дека за краток временски период општината да го добие ГУП-от, додава Шандева Доневска.
Според прелиминарните граници на проширување важечкиот генерален урбанистички план е 1.866, 3 хектари, прелиминарната граница на новиот е 3.559, 3 хектари или двојно повеќе. Најбитно е што во новиот ГУП влегуваат приградските населби Карпош, Иго Тричковиќ, Железничка станица, делот помеѓу Куманово и село Биљановце, дел помеѓу Куманово и село Доброшане … оние кои немаат статус ниту на град, ниту село. Агенцијата за планирање на просторот ќе ја утврди точната граница на планот, може да има отстапувања.
Претходно беше потпишан трипартитен договор помеѓу општина Куманово, Министерството за транспорт и врски и Агенцијата за планирање на просторот. Рокот за изработка на ГУП согласно потпишаниот договор е 36 месеци откако општина Куманово ќе ја достави одобрената планска програма на Агенцијата за планирање на просторот.
Куманово ја почна постапката за изработка на ГУП пред неколку години. Постапката е сложена, скапа, но ќе понуди решенија за многубројните проблеми со кои се соочува градот изминативе децении, сметаат стручните. Планот треба да обезбеди нови сообраќајни решенија со кои ќе се реши метежот, формирање нови населби, повеќе зеленило, пешачки зони, ефикасен јавен транспорт, уредени простори, наменети за сите. ам/сст/
МИА