Претседателот на Куба Мигел Дијаз-Канел Бермудез денеска е во посета на Србија.
Церемонијата на пречек на кубанскиот претседател Мигел Дијаз-Канел Бермудез започна околу 10 часот, а гостинот од Куба го пречека претседателот на Србија, Александар Вучиќ.
Кубанскиот претседател беше пречекан со сите почести – црвен тепих, гарда и национални химни, по што во знак на почит се поклони пред српското знаме.
После тоа започна тет-а-тет средбата меѓу Вучиќ и Мигел Дијаз-Канел Бермудез.
Во 10:45 часот се планирани пленарни разговори на делегациите на Србија и Куба предводени од претседателите на двете земји.
Вучиќ на својот Инстаграм профил објави дека е убеден дека посетата ќе даде нов поттик за зајакнување на традиционално пријателските односи меѓу двете земји, како и за продлабочување на политичките врски и економската соработка.
„Добредојдовте кај нас, драг пријателе“, напиша Вучиќ.
Во српската делегација се министерот за надворешни работи Ивица Дачиќ, министерот за внатрешна и надворешна трговија Томислав Момировиќ и министерката за земјоделство Јелена Танасковиќ.
Претседателот на Куба вчера пристигна во дводневна посета на Србија, а ова е негова прва официјална посета на земјата.