Портпаролот на УНИЦЕФ Џејмс Елдер рече дека Појасот Газа е „полош од детски гробишта“ и предупреди дека ситуацијата може да се влоши.
Елдер, кој штотуку се врати од еднонеделната посета на Појасот Газа, рече дека децата во палестинската енклава живеат во пеколни услови и предупреди на сериозни последици за децата поради недостаток на храна, вода и лекови, јави Си-Ен-Ен, пренесе Танјуг.
Елдер истакна дека децата во Газа се изложени на ризик од глад, жед и болести и истакна дека никогаш на ниту едно место не видел вакво ниво на уништување и очај.
Тој претходно изјави за Си-Ен-Ен дека родителите со кои разговарал во Газа сфатиле дека болниците повеќе не се опција за нивните деца поради постојаните напади, што го отежнувале пристапот до болниците.
Во повеќето конфликти во последните 15 до 20 години, околу 20 отсто од вкупниот број загинати се деца, а во конфликтот во Појасот Газа тој број е двојно поголем – 40 отсто, рече Елдер.