Поранешниот директор на американската Централна разузнавачка агенција (ЦИА) Дејвид Петреус ги предупреди западните земји да се разбудат затоа што рускиот претседател Владимир Путин „ќе војува со НАТО ако победи во војната во Украина“.
„Тој беше многу јасен и мислам дека е јасно, гледајќи наназад, дека требаше да го слушаме тој поединец (Путин). Ни кажува во што верува“, изјави Петреус во интервју за The Sun.
„За да го победи Путин“, истакна Петреус, „Западот мора да направи се што е можно за да и помогне на Украина“.
„Украинската војна може да се прошири во регионот доколку Путин успее во Украина. Тој нема да се задоволи да застане во Украина. Молдавија очигледно би била следна, а после тоа би можела да биде Литванија или некоја од балтичките земји“, рече Петреус, пренесе Танјуг.
Технолошки напредок
Тој оцени дека клучот за победата на Украина е брзото зголемување на бројот на војници и воената моќ со помош на нејзините западни сојузници.
„Реалноста е тешка и тоа е дополнителна причина зошто треба да направиме се што можеме за да ѝ помогнеме на Украина на секој можен начин“, рече Петреус.
Тој додаде дека Украина мора да постигне и голем технолошки напредок, потсетувајќи на нејзиниот успех во поразот на руската флота во Црното Море.
„Имајте на ум дека тие (Украинците) го направија она што го направија во Црното Море, не со помош на бродови или морнари, туку со беспилотни летала. Поморските дронови, воздушните дронови и противбродските проектили им овозможија да потонат третина од флотата во Црното Море“, рече Петреус.