Поддршката за американскиот претседател Доналд Трамп малку се зголеми на 32 проценти, откако падна на рекордно ниско ниво од 31 процент минатата недела, додека Демократската партија ја одржува својата предност пред републиканците пред изборите за Конгресот закажани за 3 ноември, според најновата анкета на Ројтерс и Ипсос.
Според резултатите од петдневната анкета, завршена во понеделник, 47 проценти од регистрираните гласачи би ги поддржале демократите, а 36 проценти републиканците, додека 11 проценти од испитаниците се неопределени.
Предноста на демократите од 11 процентни поени е за еден поен помала отколку во претходната анкета, спроведена на 19 октомври.
Кога ќе се земат предвид политичките преференции на неопределените гласачи, демократите имаат поддршка од 50 проценти, а републиканците 41 процент.
Изборите на 3 ноември ќе одлучат за контролата врз Претставничкиот дом и Сенатот на САД, каде што републиканците моментално имаат мнозинство.
Евентуалното губење на контролата врз еден од домовите би можело значително да му го отежни на Трамп спроведувањето на својата политичка агенда во текот на преостанатите две години од неговиот втор претседателски мандат.
Економските прашања, особено зголемувањето на трошоците за живот и инфлацијата, се издвојуваат како клучни теми на изборната кампања.
Дури 73 проценти од анкетираните гласачи веруваат дека трошоците за живот се движат во погрешна насока, додека 37 проценти веруваат дека демократите имаат подобар пристап кон управувањето со економијата, во споредба со 33 проценти од оние кои ги претпочитаат републиканците.
Ројтерс објави дека инфлацијата дополнително се зголемила откако Трамп наредил воени напади врз Иран во февруари, што довело до зголемување на цените на бензинот.
Истражувањето, исто така, укажува на разлики во мотивацијата на гласачите. Меѓу демократите, 46 проценти од испитаниците рекле дека се многу мотивирани да гласаат, додека 30 проценти од републиканците дале ист одговор.
Меѓу гласачите за кои се проценува дека најверојатно ќе излезат на гласачките места, демократите имаат предност од девет процентни поени, или 53 проценти поддршка во споредба со 44 проценти за републиканците.
Сепак, националните анкети не ги одразуваат целосно спецификите на изборните трки во поединечните федерални држави и изборни единици, што ќе го одреди конечниот состав на Конгресот.