Палестинската управа повторно побара да стане полноправна членка на Обединетите нации, се вели во писмото испратено вчера до генералниот секретар на ОН Антонио Гутереш.
„Денес, државата Палестина, како што е наложено од палестинското раководство, испрати писмо до (генералниот секретар) во кое бара повторно разгледување на (нашата) апликација за членство“, се вели во соопштението на Палестинската постојана набљудувачка мисија во ОН во вторникот на Х, порано Твитер.
Објавувањето вклучува писмо, потпишано од палестинскиот амбасадор во ОН, Ријад Мансур, во кое се повикува палестинското барање за полноправно членство од 2011 година да биде повторно доставено до Советот за безбедност во април.
Палестинската управа поднесе барање за полноправно членство во ОН во септември 2011 година, но не успеа да ги добие деветте гласови потребни за одобрување во моќниот Совет од 15 земји.
САД се заканија дека ќе стават вето на барањето.
САД и другите западни сили предупредија дека признавањето на палестинската држава од ОН ќе ги поништи претходните договори за поддршка на преговорите меѓу Израел и Палестинците за формирање на палестинска држава која ќе живее во мир заедно со Израел.
Шпанскиот премиер разговараше со колеги од Малта, Ирска и Словенија
Во 2012 година, Генералното собрание на ОН гласаше 138 за, 9 за и 41 воздржан, за да и се додели на Палестина „статус на набљудувач нечленка“ и покрај противењето на САД, кои таму немаат право на вето. Палестина досега ја признаа 139 земји-членки на ОН, од вкупно 193 членки.
Минатиот месец Шпанија објави дека се договорила со Малта, Ирска и Словенија да ги преземе првите чекори кон признавање на палестинската државност во окупираниот Западен Брег и Појасот Газа.
На 22 март, шпанскиот премиер Педро Санчез разговараше во Брисел со премиерите на Ирска, Словенија и Малта, кои најавија признавање на Палестина „кога ќе се создадат соодветни околности“.
Во вторникот Санчез пред новинарите изјави дека Шпанија ќе ја признае независноста на Палестина до јули и дека наскоро може да се „создаде критична маса“ во рамките на Европската унија за да можат и другите земји да го сторат истото, пренесе шпанската новинска агенција ЕФЕ.