На маргините на министерскиот состанок во рамките на Берлинскиот процес, министерот за надворешни работи, Бујар Османи оствари билатерална средба со заменик претседавачот на Советот на Министри и министер за надворешни работи на Босна и Херцеговина, Бисера Турковиќ.
На средбата беше истакнато заемно задоволство за позитивната динамика во развојот на билатералните односи меѓу Северна Македонија и Босна и Херцеговина и беа разменети мислења околу можностите за натамошно унапредување, со посебен осврт врз економската соработка, која заостанува во однос на блиските и отворени политички односи.
„Препорака на Европската Комисија да се додели кандидатски статус за членство во Унија е секако исклучително важна за граѓаните на Босна и Херцеговина и нивната иднина, но не помалку важна и за регионот на Западен Балкан, особено како порака до оние кои имаат поинакво гледање за местото и улогата на Босна и Херцеговина“, истакна Османи нагласувајќи ја поддршката на Република Северна Македонија за европскиот и евроатлантскиот пат на Босна и Херцеговина како и подготвеноста и отвореноста за споделување на искуства на овој план.
Соговорниците се осврнаа и на актуелните состојби во регионот и пошироко, како и економските и енергетски предизвици поврзани со руската воена агресија во Украина.