Унгарскиот премиер Виктор Орбан изјави денеска дека членството на Украина во Европската унија не треба да биде „инструмент за војна“, нагласувајќи дека ЕУ е основана за мир и дека проширувањето треба да му служи на мирот, а не на продолжување на војната.
Орбан рече дека прашањето за војната се уште е „на маса“ бидејќи оние во Брисел се уште го следат патот што води кон војна, пренесе МТИ.
Тој додаде дека Европа очигледно се подготвува за продолжување на војната, објаснувајќи дека членството на Украина во ЕУ може да ѝ помогне на таа земја да победи во војната.
Орбан истакна дека одлуката дали Украина ќе стане членка на ЕУ ќе има значително влијание врз судбината на Унгарија во наредните децении.
– Ќе има одредени последици доколку се дозволи пристап, како и ако тој успешно се спречи – рече Орбан.
Тој заклучи дека прашањето е од „клучно значење“ и изрази уверување дека пристапувањето на Украина во ЕУ ќе им наштети на Унгарија, унгарските семејства и ќе ги исцрпи економските успеси постигнати во последните 15 години.