Десетици вработени во американскиот Стејт департмент испратиле најмалку три интерни белешки до државниот секретар Ентони Блинкен во кои изразиле сериозно несогласување со пристапот на администрацијата на претседателот Џозеф Бајден кон израелската воена кампања во Појасот Газа, објави Њујорк Тајмс, повикувајќи се на неименувани извори.
Весникот наведува дека внатрешните телеграми, испратени преку „каналот на несогласување“ воспоставен за време на Виетнамската војна, барале од Бајден да повика на прекин на огнот во Газа.
Две белешки биле испратени во првата недела од војната, а третата испратена неодамна предлага Израел да тргува со палестински затвореници, од кои некои дури и не се обвинети, за повеќе од 200 заложници земени од палестинската милитантна група Хамас на 7 октомври.
Најмалку еден меморандум бара од администрацијата да понуди сериозен план за долгорочен мировен договор меѓу Израел и Палестинците што ќе доведе до создавање на палестинска држава.
Блинкен одговорил со е-пошта во која изјавил дека знае дека многу вработени во Стејт департментот се погодени од актуелната криза на лично ниво, пишува њујоршкиот дневен весник.
„Свесен сум дека некои луѓе во департментот не се согласуваат со нашиот пристап или имаат ставови за тоа како би можеле да продолжиме“, рече американскиот државен секретар.
„Њујорк тајмс“ пишува дека несогласувањето со политиката на Бајден се повеќе се шири во јавноста, бидејќи на почетокот на овој месец повеќе од 1.000 вработени во американската агенција за меѓународен развој (УСАИД) потпишаа писмо во кое инсистираат на прекин на огнот во Газа.
„Каналот за несогласување“ на Стејт департментот беше создаден во 1971 година за да им овозможи на претставниците на одделот да изразат критика и несогласување во врска со Виетнамската војна.
Според правилата на Стејт департментот, неистомислениците се заштитени од одмазда.
Во последниве години, вработените во Стејт департментот го користеа каналот за да го предупредат Бајден да не се повлече од Авганистан, да ја осудат привремената забрана на Доналд Трамп за граѓаните од седум земји со мнозинско муслиманско население и да го повикаат Барак Обама да изврши воздушни напади врз сириските сили, потсетува Њујорк Тајмс.