Членови на вооружени банди убија најмалку 47 лица кои се криеле во црква во близина на главниот град на Хаити, изјави во понеделник локалниот градоначалник.
Нападот започна во недела навечер, околу 22:30 часот во Кенскоф, во ридовите над Порт-о-Пренс, а градоначалникот Масијон Жан го опиша настанот како ноќ на терор. Неколку лица сè уште се сметаат за исчезнати.
Напаѓачите, меѓу другото, го нападнаа местото каде што беа сместени луѓе кои веќе избегале од насилството.
„Вооружени банди нападнаа камп за раселени лица кој се наоѓаше во црква. Тие погубија неколку лица, има мртви и десетици ранети, а некои луѓе беа киднапирани од напаѓачите“, рече Жан.
Владата изрази длабоко сочувство до семејствата и пријателите на починатите и најави испраќање дополнителни сили за повторно воспоставување на безбедноста во областа.
Ридската област Кенскоф, на стратешка позиција над патиштата што водат до главниот град, претрпе десетина напади од вооружени банди од минатата година, принудувајќи илјадници луѓе да ги напуштат своите домови, пишува Ројтерс.
Моќните банди, обединети во широк сојуз, со години го консолидираат своето влијание врз главниот град на Хаити и се шират во околните области, и покрај обидите на странските земји да ѝ помогнат на локалната полиција, која е помалку вооружена.
Според податоците на ОН, речиси 1,5 милиони Хаиќани во моментов се раселени, додека повеќе од пет милиони луѓе, во земја со околу 11 милиони жители, се соочуваат со сериозна несигурност во однос на храната.
Кризата дополнително се влоши на почетокот на 2024 година, кога бандите започнаа нов бран насилство што го принуди тогашниот премиер да поднесе оставка.
На Хаити не се одржаа избори од никаков вид од 2016 година. Последниот претседател, Жовенел Моиз, беше убиен во јули 2021 година и не беше избран наследник по неговата смрт.
Општите избори треба да се одржат во декември оваа година. Мисијата против бандите, поддржана од Обединетите нации, треба да има повеќе од 5.500 членови до есен.