Блокот на израелскиот премиер Бенјамин Нетанјаху освои 57 места на парламентарните избори во вторник, во споредба со 47 за блокот против Нетанјаху, откако беа преброени гласовите од 41,9 проценти од гласачките кутии, додека претежно арапските партии Заедничка листа и Раам заедно имаат 16 места, покажаа моменталните резултати од Централната изборна комисија.
Партиите што моментално го надминуваат прагот од 3,25 проценти се резервистите, со 2,7 проценти, Народот на Израел – 1,8 проценти и Хареди – 0,3 проценти, објави „Тајмс оф Израел“.
Резултатите, објавени до 5:58 часот наутро, сè уште не се конечни, а броењето продолжува.
Во изборниот штаб на Ликуд во Ерусалим, Нетанјаху рече дека Израел има „историска, единствена можност“, заедно со американскиот претседател Доналд Трамп, да ја „отстранат иранската закана еднаш засекогаш“.
Тој ги критикуваше партиите кои се подготвени да соработуваат со арапските партии, прашувајќи како би можеле да зборуваат за „сојуз на оние кои служат“ со партии за кои рече дека ги напаѓаат војниците на ИДФ.
Трамп на социјалната мрежа Truth Social оцени дека неговата поддршка за Нетанјаху влијаела на резултатот од изборите, наведувајќи дека, по неговата поддршка, наместо очекуваниот решителен пораз на премиерот, сега е на повидок тесен резултат или дури и победа.
Според податоците на Централната изборна комисија на Израел, излезноста на гласачите на вонредните парламентарни избори во Израел синоќа до 22:00 часот била 77,7 проценти, што е зголемување во споредба со излезноста од 70,6 проценти забележана на изборите во 2022 година.
Според достапните податоци, 5.695.682 Израелци го искористиле своето право на глас, според „Тајмс оф Израел“.
Ова е највисоката излезност на изборите во Израел од 1999 година.
Вчера во Израел се одржаа вонредни парламентарни избори за 120 пратенички места во Кнесетот.
Гласачките места беа отворени од 7 до 22 часот по локално време, а право на глас имаа околу 7,3 милиони регистрирани гласачи, јавува Танјуг.