Најмалку две лица загинаа, а три се повредени во руските напади врз четири области на регионот Дњепропетровск, додека руските сили го погодија и Запорожје, објави денес Укринформ.
Началникот на воената администрација на регионот Дњепропетровск, Олександр Ханза, објави дека руските сили ги нападнале четирите области повеќе од 20 пати користејќи беспилотни летала, артилерија и водени воздушни бомби.
Во нападите, уништени се административната зграда на прехранбената фабрика, магацин на една фабрика и неколку возила, додека средното училиште, зградата на локалната администрација, продавници и приватни куќи се оштетени.
Според неговите изјави, две лица загинале, три се повредени, а еден од ранетите е задржан на болничко лекување.
Началникот на воената администрација на регионот Запорожје, Иван Федоров, објави дека во новиот руски напад врз Запорожје, на местото на ударот избувнал пожар и дека се оштетени станбени и нестанбени згради.
Досега нема извештаи за жртви, додека сите служби за итни случаи се испратени на терен, а во градот е прогласена и воздушна опасност поради заканата од руски беспилотни летала.
Во исто време, Главната дирекција за разузнавање на Министерството за одбрана на Украина објави дека нејзините единици го уништиле рускиот крајбрежен систем за електронско војување „Мурманск-БН“ за време на операцијата во близина на ’ртот Фиолент во привремено окупираниот Крим.
Според украинската воена разузнавачка служба, тој систем е наменет за радио извидување, пресретнување и блокирање на радио сигнали на растојание до 5.000 километри. Украинската страна објави и видео од операцијата.
Руско Министерство за одбрана: Украински воени резервоари за гориво погодени
Вечерта на 30 јули, вооружените сили на Руската Федерација го продолжија нападот врз пристанишната инфраструктура на Украина, погодувајќи резервоари со гориво и мазива наменети за вооружените сили на Украина во пристаништето Одеса, објави Министерството за одбрана на Русија.
„Вечерта на 30 јули, вооружените сили на Руската Федерација продолжија да изведуваат напади со високопрецизно воздушно оружје и беспилотни летала врз пристанишната инфраструктура на Украина и морските бродови ангажирани во интерес на вооружените сили на Украина. Како резултат на ударот, во пристаништето Одеса беа погодени резервоари со гориво и мазива наменети за вооружените сили на Украина“, се вели во соопштението.